ԶԲՈՍԱՇՐՋՈՒԹՅԱՆ ՏԱՐԱԾԱՇՐՋԱՆԱՅԻՆ ՖՈՐՈՒՄ 2026

2026 թվականի հոկտեմբերի 9-11-ը Դիլիջանը կհյուրընկալի Զբոսաշրջության տարածաշրջանային ֆորում 2026-ը (TRF 2026)՝ մեկ հարթակում համախմբելով զբոսաշրջության, քաղաքաշինության, ֆինանսների, մշակույթի և դիվանագիտության ոլորտների մասնագետներին ու առաջնորդներին։ 

Այս տարվա ֆորումը կանդրադառնա զբոսաշրջային ուղղությունների զարգացմանը վերաբերող մի շարք առանցքային թեմաների՝ երկարակեցությունից և բարեկեցությունից՝ որպես զբոսաշրջության արագ զարգացող ուղղություն, մինչև ազատ տնտեսական գոտիներ, որոնք կարող են խթանել տնտեսական և զբոսաշրջային զարգացումը։ Քննարկման օրակարգում կլինեն նաև միջազգային ֆինանսական կառույցների դերը զբոսաշրջային ուղղությունների զարգացման գործում, ինչպես նաև մշակութային ենթակառուցվածքների և դիվանագիտության ազդեցությունը ուղղությունների ընկալման և դիրքավորման վրա։ 

Ֆորումի հիմնական նպատակներն են՝ 

Զարգացնել մասնագիտական երկխոսությունը՝ ներկայացնելով միջազգային փորձը, նոր մոտեցումներն ու ոլորտի արդիական միտումները։ 

Խթանել զբոսաշրջային ուղղությունների զարգացումը՝ քննարկելով մրցունակ, կայուն և տարվա բոլոր եղանակներին գրավիչ ուղղությունների ձևավորման հնարավորությունները։ 

Քննարկել զբոսաշրջության զարգացող ուղղություններն ու միտումները՝ ի թիվս այլ թեմաների անդրադառնալով նաև երկարակեցության և բարեկեցության՝ որպես ժամանակակից զբոսաշրջության զարգացող ուղղությունների ներուժին։ 

Ստեղծել նոր բիզնես և ներդրումային կապեր՝ նպաստելով գործընկերությունների և նոր նախագծերի ձևավորմանը։ 

Խթանել տեղական տնտեսության և համայնքների զարգացումը՝ ընդգծելով զբոսաշրջության դերը աշխատատեղերի, տեղական բիզնեսի և երկարաժամկետ արժեքի ստեղծման գործում։